Абайдың замандасы Көжекбай Жамантайұлына (1847-1918) арнап айтқан өлеңі.

Қашан жазылды?

Абай бұл өлеңін 1886 жылы 41 жасында ауызша шығарған.

Қайда жазылды?

4 жолдан тұратын өлең Құнанбай қажы әулетінің ата қонысы, ұлы ақын өмірінің сәулелі сәттерінің мекені – Ақшоқы қыстауында шығарған.

Қайда жарияланды?

Өлең алғаш рет ақын шығармаларының 1933 жылғы толық жинағына енгізілді. Кейінгі басылымдарында ешқандай текстологиялық өзгеріске ұшырамаған.

Өлең не жайында?

Көжекбай – Тобықты руының Мамай атасынан шыққан адам. Сөзінде тұрақ жоқ, айла-шарғы, өтірік-өсекке жақын, екіжүзді Көжекбайды ақын: «Кімнің жүгі биік болса, соған қарғып шыққан мысық» деп онша ұнатпаған. Абай бұл өлеңінде Көжекбайды өткір тілмен мінеп, шенемей-ақ, кезі келген сәтте айтылатын қарапайым тілмен оның шынайы тұлғасын ашып берген.

Қай жанрда жазылды?

Өлең 11 буынды қара өлең ұйқасымен жазылған, көлемі төрт тармақтан тұратын 1 шумақ өлең.

Қай тілдерге аударылды?

Өлең қырғыз, орыс тілдеріне аударылған.

Жамантайдың баласы Көжек деген,

Әркімге өсек тасып безектеген.

Досын келіп досына жамандайды,

Шіркінде ес болсайшы сезед деген.